La leggenda di Vesuvio e Capri

 

‘O Vesuvio, terribile e putente,

‘na vota era nu giovane garbato e ‘nnucente.

S’annammuraje ‘e ‘na figliola accussì bella

ca nu giglio a cunfronte pareva gravunella.

N’ammore contrastato,

negato e sfortunato.

‘A povera nenna nce pigliaje ‘na freva

E ogni ghiuorne chiagneva e se strujeva.

P’a disperazione ‘a mmare se menaje

e p’e prudigio ‘n’isola addeventaje.

Capri: “terra d’ammore

addo nce appizze e lasse ‘o core.”

Vesuvio quann ‘o sapette,

a guardà l’isola p’e secule rum manette.

Suspiranno fuoco, tiseco e sulagno,

p’o dulore se trasfurmaie ‘nmuntagna.

‘A tanno ogni tanto fa ‘o ‘nzisto

e nun guarda ‘nfaccia manco a Gesù Cristo;

se scete scuitato e jastemma,

‘ntrunano accussì forte ca ogni cosa tremma.

‘Ngrifato, fa ‘o sconcecajuoco

e vummecanno terra e fuoco,

draghe,  uorche arraggiate,

janare e zerepille speretate,

spanne tutt’attuorno distruzione e schianto,

fucore e morte, lamiente e chianto.